1. Ka pai' hnen in ka tlan hnu, Ka neihmi hlawnthil a cem;

    Fapa tlanhlo lamtluan ah duhdawttu hman nei loin,

    Hmanseh ka pai' mitthli cu, hul ni nei loin a luang;

    A duhdawtnak in in thlir, ataang nuam ih kir dingah.

 

         (Duhdawtnak)2 Cung Pathian ih duhdawtnak,

         Ramri a nei lo thuk in a sanzia hi!

         Tifinriat hnakin a thuk, Van hnakin a sang sawn si,

         Dam sungin ka aupi ding, cem ni nei lo duhdawtnak!

 

2. Profet pawl in an rak sim, cem thei lo duhdawtnak thu,

    Dungthlun pawl khalin an phuang, ahrek hman an sim thiam lo;

    Ca sungih ngan cawk lo le, kaa ih sim cem theih lomi,

    Cung Pathian ih duhdawtnak kan thlarau taksa damnak!

 

3. A felnak ka phu ban lo, A fimnak ka ruat ban lo,

    A cahnak a maksak si, lennak ih a khat Pathian;

    Duhdawt tlak lo in duhdawt, zaangfah tlak lo in zaangfah,

    "Ka duhdawt mi ka fahniang," ti’n in ko a va mak em!

 

4. Minung cun milian mitha, sungkhat unau kan duhdawt,

    Sihmanseh Cung Pathian cun, Amai' raal pawl in duhdawt;

    A Fapa neihsun in peek, Van nunnak co thei dingah,

    Zianghman in in then thei lo duhdawtnak sungah kan um.